“إيمان” أسست مجموعة لرحلات اليوم الواحد للنساء فقط.. ترفيه وتأمل

بسبب الانشغال فى مهام الحياة اليومية وطاحونة رعاية البيت والأولاد والعمل، نادرًا ما تجد النساء الفرصة للاستمتاع بالوقت مع نفسها ولنفسها، وغالبًا ما تكون “الخروجة” بالنسبة للنساء هدفها التفريج عن الأولاد والتنفيس عنهم وتأتى محملة بمسؤوليات مضاعفة لهن، ولكسر هذه الحلقة فكرت إيمان سمير في تكوين مجموعة نسائية تهدف  لتجميع السيدات والفتيات، للذهاب في رحلات ترفيهية لممارسة بعض الأنشطة وتعلم بعض المعانى والقيم في الحياة وقضاء بعض الوقت لتدليل أنفسهن.

تحدثت إيمان سمير، مؤسسة المجموعة لـ” اليوم السابع”:” أنا بحب الخروج جداً، وبحرص كل خروجة إنى أجمع صحابى، فكرت في تأسيس جروب على الفيس بوك، لأصحابى ونتفق من خلاله على الخروجة، وبدأت أوسع الجروب وأصبح يضم عدد من البنات والستات”.

تابعت :”فكرت في الإستفادة من خبراتى في مجال التنمية البشرية، قررت أول خروجة في حديقة الأسماك، نمارس فيها تمارين يوجا بالضحك، ويكون فيها محاضرات في مجال التنمية البشرية، ونجحت أول رحلة، ومن هنا بدأ الموضوع يتطور، وأصبح فيه إقبال كتير من بنات وسيدات، من أول العشرينات لحد الخمسينات، كانوا الأول قلقانين مننا، لكن مع الوقت أصبحنا أصدقاء، وحالياً بنخرج مرة في الأسبوع “.

تحلم إيمان بتطوير الجروب من رحلات اليوم الواحد إلى رحلة لأيام، حيث قالت :” ناوية الفترة الجاية، أحول الرحلات اليومية، لبيات لأيام، وكمان بحرص على إنى أسمى كل رحلة باسم معين وبيكون الهدف منها، زى رحلة يخت الصداقة”.

تحدثت إيمان عن الصعوبات التي تواجهها في رحلاتها، والتي تحدثت عنها قائلة :” الصعوبات اللى يمكن بتقابلنى هي تحديد الرحلة والتخطيط ليها، والأنشطة اللى لازم نعملها، وكمان بنلاقى صعوبة في توفير مكان يتناسب مع فكرتنا”.

عن تحديد مكان الرحلة قالت إيمان :”أنا اللى بحدد مكان وأحياناً بعمل استفتاء على الجروب، على المكان، وأجمع الأراء وابدأ أشوف إمكانية عمل رحلة في المكان ده، وأحياناً بيقترح عليا بعض الأعضاء أماكن للرحلات وأختار المكان وأشوف إمكانياته واتأكد من إنه مناسب لفكرة الجروب”.

هدف الجروب ليس تجمع سيدات وفتيات للذهاب لإحدى الأماكن للترفيه فقط ولكن الهدف هو تعلم بعض المعانى القيمة ودروس في الحياة، والتي تحدثت عنها قائلة :” رحلاتنا مش الهدف منها الضحك واللعب وبس، لكن بهدف برضه تعلم معانى جميلة في الحياة، زى رحلة كنت عاملاها باسم ” الحمد لله”، وفى الرحلة وزعت ورق على المشاركين، وكل واحد يكتب الحاجات اللى بيحمد ربنا عليها في يومه، وأكتر حد كتب حاجات خد رحلة اليخت هدية، والهدف من الرحلة، هو النظر لكل شيء جميل في حياتنا، ورحلة الصداقة هدفها تعرف المشاركات في الرحلة على بعضهن وأكتر مشاركة أتعرفت على أصدقاء لها جائزة، ورحلة الدعاء، وزعنا فيها ورق، وكل حد كتب دعاء لغيره، وغيرها من الأنشطة اللى بتساعد على تقوية العلاقات بين المشاركات في الرحلة”.

تضم الرحلات وجبات ومشروبات توزع على المشاركات والتي تختلف حسب المكان، وتختار المشاركات الوجبات والمشروبات التي تحتاج إليها في هذه الرحلة.